بە گوتەی ئیسلاحوێب، لەم کۆبوونەوە مەعنەوییەدا، کە ئێوارەی ڕۆژی دووشەممە ۲۴ی خەزەڵوەری ۱۴۰۴، بە هەوڵی بنکەی قوڕئان و سوننەتی پێغەمبەر(د.خ) و دەستەی ئەمیندارانی مزگەوتەکە بەڕێوە چوو، مامۆستا عەزیزوڵڵا، ئیمامی مزگەوتی ئیمام موحەممەد غەزاڵی، قوڕئانی وەک چوارچێوەیەک بۆ ڕەفتار و ڕێبازی دروستی ژیان زانی و ڕایگەیاند: «سوودوەرگرتن لە شیفای قوڕئانی پێویستی بە ئیمان بە نێردراو، ئیرادەی تاکەکەسی و بەکارهێنانی چەمکەکانی لە ژیانی تاکەکەسی و کۆمەڵایەتیدا هەیە.»
دواتر، جەلیل بەهرامینیا، سەرۆکی دەستەی کارگێڕی ڕەوانسەر، بە جەخت لەسەر پێویستیی گونجاندنی ڕەفتاری بانگخوازان لەگەڵ بەها سرووشییەکان، ئاماژەی بەوەدا کە هەڵگرانی قوڕئان دەبێ بە پاراستنی پاکی دەروونی و دوورکەوتنەوە لە خراپەکارییەکانی وەک تەماح و دەمارگیری، ڕەنگدانەوەی دادپەروەری بن لە کۆمەڵگادا.
مەراسیمەکە تێکەڵ بە دەفژەنی و خوێندنەوەی سروود لەلایەن لاوانەوە بوو و بە پێشکەشکردنی خەڵات بە زیاتر لە ١٥٠ فێرخوازی قوڕئانی کۆتایی هات.
شاری ڕوانسەر پێشتریش لە بۆنە ئایینییەکانی جۆراوجۆردا، بۆ پتەوکردنی بناغەی دینی گەنجانی ناوچەی هەورامان میوانداریی کۆبوونەوە قوڕئانییەکان و دانیشتنەکانی شیکاریی بووە.
ڕوانسەر کە بە "دەروازەی هەورامان" ناسراوە، شارێکە خاوەنی سروشتێکی سەرنجڕاکێش و ناوازە و کەسانی دیندار و هەڵکەوتە لە پارێزگای کرماشان.
بۆچوونهکان